Анай кыл

Мае гинэ уд кылы асьме улонын,
Тодмо адями кызьы ке но шуиз:
Анай кылмы, пе, милям пыдло выемын,
Пыдсаз ик кылле кулэтэм маке из.

Милям, пе, кылмы нокинлы кулэ ӧвӧл,
Дырыз, пе, солэн ортчемын, быремын.
Уз, уз вӧлъя ни, пе, кырӟанмес шуныт тӧл,
Али, пе, ваньмыз верасько ӟуч кылын.

Шыпыт кылзӥськи вал мон солэсь верамзэ,
Сюлэм пазяськиз: серекъяз но бӧрдӥз.
Кызьы валэктом ай ышемлы шонерзэ,
Кудӥз пыӵамтэ мумизлэн йӧлыныз?

Кызьы валэктом инкуазьлэсь кырӟанзэ,
Кытын чеберез дуннелэн сурамын:
Пӧртэм куараос люкасько огазе,
Пӧрмо сюлэмез буйгатӥсь крезьгурлы?

Кызьы валалоз со милесьтым кырӟанмес,
Кытын жингыртэ гуртъёсысь черк гырлы,
Пӧрме Кам шурлы пичильтык гинэ ошмес,
Нош пичи гинэ тысь - зарни бусылы?

Кулэтэм маке из чик ӧвӧл кулэтэм,
Дуннеысь со кутэ бадӟым гурезез,
Туннэ асьмеос кылёмы ке кылтэк,
Ӵуказе согозы музъеме калыкмес.

Бадӟым гурезьмы куашкалоз пырылы,
Пырдыса со сьӧры быроз адями,
Чалмозы улонысь кырӟанъёс пыраклы,
Пурысь шобретэн ворсаськоз дуннемы.

2017

Тӥ пукиськоды Миндэр Левлэн нимлыко вотэсбамаз.

e-mail: levminder@gmail.com