Гужем яратон

Шунды пиштэ, пилем лобӟе,
Тол бӧрсьы гужем вуэ...
Кин ке но вера вал мыным,
Мон мар понна та улонын?

Со гужеме шунды ик мукет сяин пиштӥз - аслэсьтыз яркыт тылсиоссэ со жалятэк кисьтаз музъем вылэ. Мар борды гинэ ӧз йӧтскылэ со тылсиос, ваньмыз тырмылӥз шунытэн, кудӥз пеймыт уйин но ӧз бырылы - шӧдӥськылӥз котыр омырын.

Одӥг котомкае кулэ арбериоссэ но дӥсьсэ тырыса, Дима пуксиз валес вылаз. Тани нош ик ортчиз дышетскон ар - куинетӥ курс кылиз бере. Йыраз берпуметӥ толэзьёсты бергатӥз - солы потӥз, ваньмыз уйвӧтын кадь ортчиз шуыса. Али гинэ экзаменъёслы дасяськоно вал кадь, нош табере быризы соос но. "Чаляк ик дыр мынэ", - малпаз со ас понназ, собере султӥз но, котомказэ ныпъяса, потӥз. Бетон борддоръёс вискын так но уг чида вал улыны, нош таӵе ӝокыт куазен тужгес но. Соин, кема ӝегатскытэк, берпуметӥ дышетскон нуналаз ик шонтӥз автостанцие. Азьло аръёсы кадь ик, тайзэ гужемзэ со малпаз ортчытыны гуртын, кытын улэ вал песянаез.

Калык автобусын тачак вал. Удмуртарняе весяк озьы луэ - адямиос, кудӥз пӧлын тросгес ачиз кадь дышетскисьёс, берто доразы. Пиала сьӧрын пумен ог-огзэс вошъяса ортчылӥзы ӝужыт нюлэсъёс, паськыт бусыос, пӧртэм гуртъёс. Соос шоры учкыса, Дима ӧз ик вала, кызьы ортчиз кык час ворттонэз, но автобус вуиз солэн гуртаз. Сюрес жадьтытӥз пияшез - вуэм бераз со валес вылэ выдӥз но ӝамак умме усиз.

Ӵуказеяз Дима мынӥз Андрей доры.

Андрей вал Дималэн матысь эшез. Соос пичи дырысенызы тодмо ини. Куке Дималэн анай-атаез кельто вал пичи пизэс гужемлы песянайзы доры, со нырысь ик кошке вал Андрей доры. Ӵошен соос шедьто вал мар ужаны: яке чорыганы мынозы, яке Андрейлэн песятаез вӧзын бергалозы, кудӥз огшоры пуллэсь пӧрмытылэ вал паймымон арбериос, яке чик юаськытэк атаезлэн мотоциклэныз ворттылыны потозы. Йыртэманы но юрттӥськыны но вуттылӥзы - мӧзмон дырзы чик ӧй вал.

Шунды ӵукнаысен пыже ни вал, соин ик пиос, кема малпаськытэк, кошкизы тымет доры сӥялскыны.

Тымет дорын адямиез трос ӧй вал на: кӧня ке пичиос пӧртэм буёло пыласькон арбериосын пальккето вал зарезь вӧзын. Андрей, кызьы вуиз, ӝамак вылӥ дӥсьсэ куштыса, зымиз мургез азяз. Ӝоген Дима но сьӧраз пыриз. Кема ик дыр ӧз ортчы, соос потӥзы зарезь дорысен бадӟым вис кельтыса. Татын, пыдлон, вуэз ик салкымгес вал. Кӧня ке огшоры уяса, Дима берытскиз тыбыр вылаз. Киоссэ палэнэ лэзьяса, выйонтэм вылысь, со пиштӥсь шундылэсь синъёссэ кыниз но вань мугорзэ буйгатыны тыршиз. Мугорэныз валче ачиз но басылак луиз. Котыр шыпыт: ву пыр пель дорозяз уг вуо куараос; яркыт шуныт шунды, вирсэрлы сӥялэс ву - кыльлы но кыльлы вал тазьы. Одӥг та понна гинэ бертан яра вал гуртэ. Соку Дима уг тоды на вал, таӵе каньыл мылкыд луэмез берпуметӥез луоз но ӝоген солэсь сюлэмзе пилёзы шуыса. Угось, огпол пилем сюлэмез номырин но уд лякы ни, уд бурмыты - со весяк кыллёз секыт возъетэн адямилэн пушказ.

Вуысь потэм бераз, куасьтӥськыкуз, пыласькон доры вуиз Лика.

- Ӟечбур, Дима! Мон ӧй но тоды на вал, тон бертӥд шуыса.

- Чырткем. Мон кылем ӝыт гинэ вуи вал.

- Мм.. Озьы шат, я иське. Нош мар огнад, кытын Андреед?

- Вуысь ӧз поты ай. Тӥни, - синъёсыныз возьматӥз пияш.

Нылаш кӧня ке сылӥз ай вӧзаз, маке веран турттыса, но вылысьтыз дэремзэ куштыса, вамыштӥз ву доры. Вуэ пырем бераз, со берытскиз но шуиз:

- Тыныд Андрей ӧз вера, луоз, соин тон уд тодӥськы на, дыр. Азьвыл кӧснуналэ со Ленаез кураны ветлӥз. Соослэн толэзь ортчыса сюанзы луоз.

Дима та кылъёс бере шуккем кадь луиз, каньыл мылкыдыз чапрак тӧлӟиз. Пияш малпаськонэ усиз.

Ӧвӧл, озьы уз луы. Лена, кудӥзлы Дима синмаськемын вал, матысь эшезлы - Андрейлы - бызе. "Лика алдаське, луоз. Со быгатоз!" - ӧз оскы нылашлы пияш. Ачиз нош Андрей сярысь утыр малпа. Тодаз вайиз солэсь адӟиськем тырысенызы ӧжыт вераськемзэ - мае ке но ватэ кадь. "Мар мон татын тунаськыса кыллисько? Тани Андрей потоз, аслэсьтыз ик юало..." - малпаз Дима. Куинь ар талэсь азьло соос пӧлын кылдӥз ни вал керетон одӥг нылаш понна, соку вормиз эшъяськонзы. Со тырысен соос вераськизы, нокыӵе но нылаш эшъяськонзылы пумит уз султы ни шуыса. Но Андрей потэм бере но, сюрес вылтӥ бертыкузы но Лена сярысь Дима солэсь ӧз юа. Кӧня ке кенешизы куазь сярысь, ӧжытак пинал дырзэс тодазы вайизы но, "ӵуказеось" шуыса, люкиськизы.

Гуртаз ини, сиськыкузы, песянаезлэсь юаз:

- Бабу, зэмзэ ик а верало, Андреен Лена кышноясько шуыса?

- Бен, монэ но ӧтизы. Тыныд Андрей ӧз вера шат?

- Ӧз. Ма, мон ӧй но юа...

Ӝытазе, бакча емышъёс вылэ ву кисьтам бераз, Дима шонтӥз гурт пумысь вырйылэ.

Йылаз ик тубыса, со пуксиз, киосыныз пыдесъёссэ ӟигыртыса, но учкиз гурт шоры. Татысен ваньмыз кипыдэс вылын кадь адӟиське вал. Тани кижи-кожи пичи гинэ шур пыре гурт пушкы но люке сое кыклы. Нырысь со ортче бамал улысь возь вылтӥ, собере, гуртэ пырем бераз, со шурэз келяса, урдэсъёстӥз лэзьяско ӝуӝытэсь но пичиесь бадьпуос. Кӧня ке палэнын сылэ кызьпу парк. Со вӧзын кык этажъем школа. Мукет палаз, гурт вылланьын, вал ферма но колхоз гаражъёс.

Йыр вылысь пеймыт лыз инбам инвис пала кыстӥськыкуз, кудӥз сьӧры алигес ышиз шунды, пумен лемлет буйем кариськылӥз. Со лемлет инбам вылтӥ каллен гинэ, оло воксё дугдиллям кадь, уяло вал ӧжытак пичи бусӥр пилемъёс. "Сыӵе чебер ӝыт, нош кыӵе шӧтэм мылкыд - бӧрдэм ик потэ!" - малпаз соку Дима.

Та вырйылын со Ленаен нырысьсэ пумиськиз. Вал со пичи дыръязы, тол куазе. Соку Дима Андреен, мукет нылпиос сямен ик, вуизы татчы нискыланы. Ӵапак Дима нискылтыку, Лена тубе вал. Шуккиськемзы бере сокем номыр но ӧз луысал, дыр, но, Леналэн ӝамак гинэ син улаз лыз-вож кылдӥз. Нылаш соку бӧрдыны ик кутскиз вал. Дима, сое адӟыса, шаплы вераз: "Ӧн бӧрды гинэ, кылӥськод-а? Потэ ке, шуккы монэ. Вай, шуккы! Эн бӧрды гинэ, ява?" Лена кутӥз но шуккиз сое. "Тон мар-о? Вӧсь ук!" - паймиз пияш. "Нош мыным ӧвӧл шат? Ачид косӥд ук", - вазиз нылаш. Дима мынектӥз. "Серем ӧвӧл", - вераз вал но Лена, ачиз ик пальпотӥз.

- Кин пукоз на уйшор азьын гурт пумын огназ инбам шоры учкыса? Дима гинэ, - бераз вазиз нылаш куара.

Пияш берытскиз. Со азьын сылэ вал Лена.

- Мон тодӥсько вал, тон татын луод шуыса, - будэтӥз нылаш, Дима вӧзы пуксем бераз.

Дима номырно ӧз вазьы, берыктӥз синъёссэ шунды пуксён пала но тодаз вайиз Ленаен берпуметӥ пумиськон нуналзэс.

Соку гужемлэн берпуметӥ нуналъёсыз мыно ни вал. Соос ӵошен потӥзы клубысь. Крезьгур чузъяське на вал, ма, эктонни бырытозь но кема вал ай, но таослэн кошкемзы потӥз вазьгес. "Эх, куазез салкым кариське ни, эшшо та нымыос", - клубысь потэмзы бере вераз Лена но чапкиз суй вылаз кыллись кузькукез. Нылаш соку одӥг дэрем коже гинэ вал. Дима вылысьтыз куртказэ куштӥз но дӥсяз Лена вылэ. Бертыкузы дугдӥзы шур вылтӥ ортчись выж шоры. Лена дураз султӥз но ву шоры учкиз. "Мар адӟид?" - юаз Дима, вӧзаз султыса. "Вукузёес учкисько, - чик мынятэк вазиз нылаш. - Мыным пичи дыръям песянай весь вера вал, шур доры уйшоре потаны уг яра шуыса, а то, пе, вукузё потоз но сьӧраз ву пушкы кыскоз". "Кышканэд медаз луы. Потӥз ке но, мон тонэ уг сёт", - вераз пияш. Соос берытскизы но ваче азин султӥзы. Дима небытак гинэ тыриз киоссэ Леналэн кус вылаз, соиз нош аслэсьтыз пияшлэн пельпумаз. Пиналъёс кӧня ке синъёссы шоры учкыса улӥзы на но, ымдуръёссы каллен гинэ ог-огзы доры кыстӥськизы. Пиналъёслэсь ненег чупаськемзэс выж улысь бызись шур но куспетӥ карыны ӧз дӥсьты кадь со уе: музэн шыпытгес бызьыны тыршиз. Нош ӵуказеяз Дима вазь ӵукна ик бертӥз дораз - городэ. Лена изе на, дыр, шуыса, кошкиз солы жингыртытэк. Ӧз жингырты со бертэм бераз но. Гуртэ но со тырысен толло нуналось ӧз вуылы ни.

Дима выльысь берытскиз Лена пала.

- Мон тыныд огпол ке но жингыртысал, ваньмыз мукет сяин луысал. Озьы ук? - юаз со Леналэсь, чик валэктэмзэ возьматэк.

Нылаш номыр но ӧз вазьы, кӧня ке дыр ортчем бере гинэ шуиз:

- Кылем арын сомында нымыос вал, нош туэ одӥгез но ӧвӧл, хм...

Дима учкиз нылаш шоры. Соизлэн синъёсыз ворекъяло вал азьло сямен ик. Озьы ик, азьло сямен, пияш кыстӥськиз Лена доры. Нырысь каллен гинэ тупатӥз нылашлэсь кымесаз лэзькем йырсизэ, мар бере соиз, нуныяськыса, кипыдэс бордаз бамыныз лякиськиз. Небыт гинэ ымдураз чупаса, Дима каллен, вешам сямен, кизэ нылашлэн кус дорозяз лэзиз. Лена ӧз палэнты сое - аслаз киыныз пияшлэсь каньылля дэрем бирдыоссэ пертчыны кутскиз. Пертчем бераз, кизэ пияшлэн мугор бордаз лякиз. Дима соку, чупаськемысь дугдытэк, Ленаез улаз пачкатӥз. Ымдуръёссэ чупам бераз, пумен васькиз улланьгес, каллен гинэ ымдуръёсыныз нылашлэн чырты бордаз йӧтскыса. Собере, озьы ик дыртытэк, лэзиз киоссэ но Леналэсь дэрем улзэ ӝутӥз. Шоканзы ӵемгес луиз.

Султэм беразы, инбам ӟаректэмын ни вал, шунды нош ӝужамын ой вал на.

- Ӟеч лу, Дима. Мон сярысь вунэты табере. Шедьтод ай аслыд нылаш... Чебер но яратоно, мынэсьтым умойгес, - вераса куштӥз Лена, ассэ тупатэм бераз.

Нош аслаз синвуосыз бызё. Собере берытскиз но гурезь уллань чаляк вамышъяса кошкӥз.

Тани татын пилиськиз Дималэн сюлэмыз. Лика верам бере ӧз, песянаез верам бере ӧз. Али. Куке ачиз Лена вераз.

Сюаназы Дима ӧз ветлы. Дышетскыкуз со гуртэ ӧз ик вуылы ини. Нош дышетсконзэ быдтэм бере, диплом басьтыса, кошкиз мукет шаере, кытчы ӧте но кытын вазенгес ужа ни вал одӥгез эшез. Дималы отын кельшиз, соин сэрен отчы ик уже интыяськиз. Ӵапак отын луыкуз, Дима доры вуиз кӧшкемыт ивор, Ленаен Андрей сюрес вылын пазьгиськиллям но кыкназы ик быриллям шуыса. Ӝамак бертэмез ӧз луы. Ӝыны ар ортчыса гинэ, отпуск сётэмзы бере, вуиз.

Соку сылӥз шуныт гужем нунал. Дима, шайвылэ ветлэм бераз, ваське вал дор палаз. Сюресэз ортчиз Леналэн ульчаетӥз. Ӵапак солэн капка азяз Дима пумитаз Ликаез, кудӥз шудэ вал луо вылын пичи пияшэн.

- Чырткем, Лика, - шуиз со, дораз лыктыса.

- Умой, Дима. Вазен ӧм адӟиське ни.

- О-о, вазен. Тон, оло, пияса вуттӥд ини? - мынектӥз пияш.

- Ӧй, тон мар вераськиськод? Со Леналэн пиез, - вазиз нылаш.

- Озьы шат. Соослэн нылпизы но кылем, иське. Мон ӧй тоды вал.

Дима пыдесъяськиз но пияш шоры учкиз. Пияш но со шоры учкиз.

- Чырткем, пиёк. Тынад кызьы-о нимыд? - юаз Дима солэсь.

- Макщим, - вазиз каллен пияш.

- Синъёсыз нош копак анаезлэн кадесь, - вераз Дима.

- Синъёсыз анаезлэн, нош ымныр тусыз чылкак тынад кадь, - шуиз Лика.

- Ӧй вала, - паймиз Дима.

- Со тынад пиед, Дима.

- Я, оломар но эн вераськы.

- Тон мыным вера ай, мон тонэ куке но алдай ни-а? Мыным Лена азьло ик вераз ини вал.

Дима чалмиз. Лика но номырно ӧз куарэты ни. Максим гинэ шудонъёсыныз каллен куашетӥз. Дима учкиз со шоры. Пияш луоез, пичи куйеныз омыртыса, кисьтӥз шудон машиналэн уробояз, собере ворттӥз сое кӧня ке палэнэгес, кытчы, уробозэ ӝутыса, кисьтӥз тырем луозэ. Берлогес Дима берыктӥз синъёссэ нылаш пала. Лика вал Леналэн покчи сузэрез. Али, будэмъяз, со эшшо но золгес кельше вал апаезлы. Зэм но, Лика ноку ӧз алдалля Димаез. Марысь мар луэ ке, Лика нырысь ик тырше вал Дималы вераны, юрттыны солы - нылаш пичи дырысен синмаськемын ни вал Дималы. Нош Дима сое весяк адӟымтэ карылӥз, апаез сьӧры бызьылӥз. Али гинэ пияш валаз ай, кыӵе секыт вал Ликалы, солэн апаеныз ӵош луэмзылы. "Эх, умой ик тон нылаш, Лика!"- шуиз со, ӧжытак малпаськем бераз. Ӵуказеяз кошкыны дасяськись пияш таяз учыре медӥз эшшо кӧня ке нуналлы кыльыны.

Нош сӥзьыл кутскыку, соос шудӥзы сюанзэс. Калыкез трос вал: быдэс гуртсы, эшшо палэнысь лыктэмъёс на. Пукизы ӵукнаось, ӵуказеяз ӝыт но люкаськизы на. Ваньмыз сӥзизы пиналъёслы кема но шудбуро валче улон. Пиналъёс нош мынекъязы гинэ но куддыр, калык куремъя, чупаськылӥзы. Пияшсы но сьӧрысьтызы чик ӧз кыльылы - бер ӝытозь пукиз вӧзазы. Инкуазь но соос понна вал кадь - нуназе ӵоже, гужем куазь возьыны тыршыса, пиштӥз шунды, нош пуксемез бере ини, бер ӝыт, ворекъясь кизилиосты ворсаса, кыстӥськизы пурысь пилемъёс, асьсэныз валче пичи зорез вайыса. Ӧжытак гинэ музъемез коттыса, ӵукналы соос воксё ышизы, нош инбамын выльысен пиштӥз шунды. Со нуналэ кин ке но рос-прос учкысал ке Дималэн но Ликалэн синъёсазы, адӟысал, дыр, кызьы отын пушказы кыкназылэн ик пуке пичи гинэ мырдэм адӟиськымон куректон, но сыӵеез ӧз сюры. Юмшанзы удалтӥз.

2012

PDF

Тӥ пукиськоды Миндэр Левлэн нимлыко вотэсбамаз.

e-mail: levminder@gmail.com