Шахмат

Мон азьын сьӧд тӧдьыен
Ӝӧк вылын ожмасько выльысен,
Тӧл лымыен укно сьӧрын
Пурӟытэ, сура малпанме мынэсьтым.
Куке тынад вирсэрад лымы –
Сыӵе дыре капчи сураськыны.
Кытын азьло сылӥз кызьпу,
Усёз адями, машина шуккыку.

Вал тэтчалля туж кыдёке,
Эсьмаса кутыны шуг сое.
Вунэтыны шедьтӥд ке тае,
Вормондэ адӟытэк кылёд, эке.
Ӧс куспын сылэ мынам
Шудо егит дыры – возьма.
Таӵе дыре капчи люкиськыны:
“Эн возьма, кошкы, мын!”

Эксэй ӧвӧл быдэс даур,
Нош йырамы улэп на со.
Калык вите аслыз шудбур:
“Эксэй вуоз – ваньзэ лэсьтоз,
Медаз гинэ кельты вал
Дано, ваньмес утись Инмар!”.
Ӧвӧл кужым таин нюръяськыны –
Троссэ быдтэ пияла гумы.

“Огъя улон бордын – кужым”, –
Нош вера теле-радио тулкым.
Огъя ваньмыз милям луоз;
Пушнер пушкын сяська будоз –
Валатэк уг яра кылльыны,
Куке вуоз дыр бырйыны:
Шунды одӥг сямен пиштоз –
Воштӥськозы шораз учкись синъёс.

Слон адӟе одӥг буёл:
Аслаз сюрестӥз гинэ ветлэ, –
Озьы малпамын шудон.
Адями нош малпамын ӧвӧл:
Со аслыз ачиз сюрес
Лёге, яке лёгемзэ быръе.
Кыӵе куддыр луэ шимес
Улон – малпаськон лыктэ йыре.

Шонерак ветлэ сэрегысь ладъя,
Мар азяз сюре – ӵогъя.
Гужем уз вуы толалтэ;
Кыдёкысь одӥг пичи гуртын
Воргорон аслыз кенер шуккымтэ –
Улон вошъяське син азьын.
Трос инмын пӧртэм кизилиос,
Нош милям ӧвӧл соос.

Пичи тӧдьы прич бордысен
Кутскиз татын ӟеч ожмаськон:
Одӥг пичи вамыш усьтӥз
Шыпыт сылӥсьёслы чебер базмон.
Мушлэн эн ветлэ матэтӥз,
Тыршемез солэн туж паймымон.
Укыр трос милям татын
Ужмы. Озьы, вылды, кылдэмын.

Вал огдыр вӧзам яратонэ –
Вунэтыса кельтэм горд айшетсэ.
Кечат-вамат отын суред,
Кечат-вамат мынам шудэ:
Тӧдьызэ веръясько пичияк гинэ –
Выльысен вуисько сьӧдэз вылэ.
Берпуметӥ ветлон - сьӧд сэрегын
Пачкамын король...Пелляське кырын.

2017

Тӥ пукиськоды Миндэр Левлэн нимлыко вотэсбамаз.

e-mail: levminder@gmail.com